«За Новыя Смалявічы» адзначылі сваё ПЯЦІГОДДЗЕ!

У мінулую суботу — 11.12.2010 грамадская ініцыятыва «За Новыя Смалявічы» адзначыла свой першы вялікі юбілей — 5-годдзе! Нам ужо 5-год!

Святочная атмасфера і выдатны настрой панавалі ў суботу на «Свяце сяброў і аднадумцаў»! Менавіта пад такой назваю ў адным з катэджаў горада сабралося каля 60 удзельнікаў свята. А гэта: заснавальнікі ініцыятывы і яе сябры, прыхільнікі і госці свята (з Жодзіна і Мінска), тыя хто спрычыніўся да дзейнасці ініцыятывы і дапамагаў на працягу 5 год!

Як адзначыў Віктар, адзін са стваральнікаў Ініцыятывы: «Зараз ужо ніхто не зможа ўзгадаць дакладна, каму першаму з нас прыйшла ідэя заснаваць тое, што зараз ёсць. Ніхто не зможа назваць дакладную дату стварэння і каму «належыць» назва ініцыятывы -хто прыдумаў «За Новыя Смалявічы»?!

Вось што сказаў Яўген, адзін са стваральнікаў ініцыятывы і арганізатараў дадзенага Свята: «Узгадваю толькі тых людзей, якія 5 год таму выказваліся за стварэнне падобнай ініцыятывы. Ініцыятывы, якая б змагла аб’яднаць вакол сябе, не вакол арганізацыі, а вакол ідэі стварэнне чагосьці карыснага для Смалявічаў. Некаторыя з тых людзей перабраліся жыць і працаваць у Мінск ці іншыя гарады. Аднак, значная іх частка дагэтуль жывуць у Смалявічах.

Што тычыцца назвы ініцыятывы, то, сапраўды, складана знайсці аўтара. Памятаю, што разважалі калісьці, чаго нам не хапае ў Смалявічах. Улічваючы, што Смалявічы — гэта стары, савецкі горад — думкі сыходзіліся ў адным — нам не хапае чагосьці НОВАГА! Так паступова і «нарадзілася» назва «За Новыя Смалявічы». Менавіта ідэя новых, камфортных для працы і жыцця Смалявічаў натхніла нас некалі да стварэння Ініцыятывы «За Новыя Смалявічы». Якая паспяхова дзенічае і дагэтуль!»

Асноўная частка мерапрыемства доўжылася з 19 да 3 гадзінаў ночы! Менавіта на такі час расцягнулася канцэртная частка нашага свята!

У канцэртнай частцы выступілі: гурты Za Sтеклом,  Just Go, Нестандартны Варыянт, BeatBrothers, выканаўца беларускага рэпа Vinsent, дыджэй-праект Hanz&Gruber, а таксама МС Pood!

Зараз можна смела адзначыць, што гэтыя 5 год для ініцыятывы былі паспяховымі! Будзем і надалей спрыяць развіццю нашага горада!

А зараз прапаноўваем вашай увазе першыя фотаздымкі са святочнай вечарыны! Паступова галерэя будзе абнаўляцца, а таксама будзе выкладзена відэа!

Даведка:

Грамадская ініцыятыва «За Новыя Смалявічы» была створана ў снежні 2005 года.

Людзі, якія стваралі ініцыятыву ставілі сваёй мэтаю абстрагавацца ад «вялікай» палітыкі і працаваць у сваім і на свой рэгіён. Ініцыятыва зрабіла спробу аб`яднаць вакол сябе тых жыхароў Смалявічаў, хто і надалей жадае тут жыць і працаваць!

Галоўнымі сваімі прыарытэтамі сябры Ініцыятывы вызначылі асветніцкую і адукацыйную дзейнасць. У сувязі з чым вядзецца праца па стварэнню інтэрнет-партала. Невялікім накладам выпускаецца бюлетэнь «Горад Наш».

Над усім гэтым у вольны ад асноўнай працы час працуюць радавыя Смалявічане.

Грамадская Ініцыятыва «За Новыя Смалявічы» заўжды радая бачыць у сваіх шэрагах новых людзей.

Калі вам неабыякава становішча ў Смалявічах – далучайцеся да нас!

Разам мы зможам зрабіць наш горад лепш!

І памятайце! Смалявічы маюць будучыню! Але якую, залежыць ад Нас з Вамі!

Інфармацыйныя прадукты ініцыятывы
Каляндар на 2010 год ад Грамадскай ініцыятывы "За Новыя Смалявічы"

10 каментароў